Al Ródiu ´L Ñora

Entamamos a caleyar na ilesia prerrománica de San Pedru Ñora, conceyu Les Regueres, que nesti sitiu ta separtáu del conceyu Uviéu pol Ríu Ñora.

Hasta equí llegamos pola autovía A-63 que vá a Gráu y L´Espina, salimos en Trúbia, (Uviéu) y na retonda l´entrada, tomamos la carretera As- 233, direución Aviles, onde llega dempués d´atraviesar: Les Regueres, Llanera y Corvera. A tres kmtrs de Trúbia, ta San Pedru Ñora.

Vamos remontando ´l ríu Ñora: pasamos xunta una fuenti, llavanderu, bebederu; tamién pasamos baxu ´l viaductu l´autovía; siguimos acompangando ´l ríu poles arriondes ...

y nesto el camín voltia de sópitu y va subiéndomos por una cuesta la mar de pindia,

que mos va separtando del Ríu (guey vese mal a cuenta la borrina)

 y mos va subiendo al pueblín de El Campanal y Quexu, puntu más altu desta Vía Verde San Pedru Ñora-El Pedréu-Puente Gallegos.

Baxamos a Puente Gallegos y podemos volver pol mesmu camín ó por otru marcáu pa volver faciendo un redondel, poro, nós, non lu viemos, asina que vamos siguir pol camín que atraviesa ´L Monte Naranco.

En Puente Gallegos, xúntense: la Vía Verde ´L Ñora, (de la que acabamos facer la mitada); el P.R. que atraviesa ´L Monte Naranco, (que vamos entamar agora); la Ruta La Plata; el Camín Real de La Mesa; el Camín de Santiago.

Dende Puente Gallegos, empecípia una cuesta suave que na más pasar l´aldeína de Vega, ponse más píndia. Vamos pente caseríes, les más abandonades dende cuantayá.

Llegando a la cumal del Monte Naranco, vemos les trincheres l´última guerra con unos cuantos nieros d´ametralladora.

Tamién vamos viendo ´l valle Sancloyo y la mecedura ´l só ríu col Ríu Ñora.

Sierres del Monsacru y L´ Aramu, nun momentín que escampó.

Más arriba, un mirador con una estatua llargarita, de munchos collorínos que tién pel mediu un furacucu con forma triángulu pa poder ver al traviés l´estatua ´L Cristu, a la qu´entovía queden seis kmtrs pa llegar.

Equí, salímonos de la ruta y tomando la direución contraria a Brañes, vamos baxando a ´L Llano y Les Campes ú garramos el tren de FEVE que mos dexa en San Pedru Ñora, casique cinco hores dempués. El desnivel ye de 100 mtrs positivos y otros tantos negativos en primer ramu y 400 en segundu.